Mbyllur-Lajme dhe Diskutime per Sportin! Futboll.:.Motosport .:.etj

[Damian1]

Raul është magjik me 3 gola, Real 4 pikë larg Barcelonës

Sulmuesi dhe kapiteni i “merengues” shënoi 3 herë në portën e Sevilla ndërsa Real Madrid tani ka ngushtuar në 4 pikë diferencën me Barcelonën në krye

Derbi i dytë i javës së 33-të në La Liga, i zhvilluar në Sanchez Pizjuan ndërmjet Sevillas dhe Real Madridit, ka përfunduar me fitoren e Los Merengues me rezultat prej 4-2. Mbretërit e filluan ndeshjen me skuadër të përgjysmuar duke llogaritur mungesat e tilla si ajo e Heinzes, Pepes, Robbenit dhe Sneijderit, por duhej të shënonin fitore me çdo kusht për të ngushtuar diferencën e pikëve me Barcelonën, e cila të shtunën mbrëma barazoi në Mestalla kundër Valencias.

Në gjysmën e parë të takimit skuadra vendase tregoi lojë shumë më të mirë, sidomos në 25 minutat e para, kur Los Blancos nuk vëreheshin në fushë. Pikërisht në këto minuta të para erdhi goli i parë në ndeshje i shënuar nga Renato (17’).

Përveç golit të shënuar andaluzianët shpërdoruan edhe disa raste të mira për të krijuar avantazh më të lartë, mirëpo nuk e arritën këtë gjë duke mos qenë të saktë përballë Iker Casillasit. Nga ana tjetër, për mysafirët dy raste shumë të mira i pati Gonzalo Higuain (30’ dhe 31’), i cili u tregua vetjak dhe i pasaktë përballë Palop. Në sekondat e fundit të pjesës së parë, legjenda e Real Madridit, kapiteni Raul Gonzales barazoi shifrat, pas një krosimi të ulët të Christoph Metzelder dhe me këtë rezultat skuadrat shkuan në pushim.

Në pjesën e dytë Reali u tregua skuadër më e mirë dhe më stabile në fushë dhe kjo rezultoi edhe me shënimin e tre golave. Ishte sërish simboli i Los Blancos, Raul, lojtari i cili e mposhti për të dytën herë portierin Palop (63’), për t’ia dhënë avantazhin skuadrës mysafire. Tre minuta më vonë (66’), Raul Gonzalez Blanco kompletoi hat-trickun e tij pas një gabimi të portierit vendas, i cili ia dhuroi një top kapitenit madrilen. Dhjetë minuta pa përfunduar koha e rregullt e takimit (80’), i inkuadruari në lojë në pjesën e dytë Diego Capel, ngushtoi epërsinë në 3-2, pas një gabimi të ish-lojtarit të Sevillas, Sergio Ramos.

Në minutat shtesë të takimit (90’+2), Marcelo shënoi golin e katërt për Realin, i cili fundosi shpresat e Sevillas për barazimin e rezultatit. Me këtë fitore, Real Madridi ngushton diferencën në vetëm katër pikë me liderin e La Ligas, Barcelonën, për të shpresuar për një fitore në El Clasico që zhvillohet javën e ardhshme në Santiago Bernabeu.

[Damian1]

Napoli mundi Interin 1-0, vendos uruguajani Zalayeta

Skuadra e Napolit i ka shkaktuar një humbje Interit kryesues në Serie A, duke fituar 1-0 me golin e sulmuesit Zalayeta

Ndeshja mes Napolit dhe interit që kryeson ende Serie A, është mbyllur 1-0 në favor të skuadrës së qytetit jugor e cila i ka shkaktuar humbje kampionëve të Italisë. Tani Mourinho duhet të preokupohet për një ndjekës tjetër si Milani në vendin e dytë.

Ndeshja e luajtur përballë 72 mijë spektatorëve në stadiumin “San Paolo” u vendos nga një sulm krejtësisht amerikano latin.

Një aksion i nisur nga këmbët e Lavezzit u dërgua në rrjetë nga sulmuesi uruguajan Marcelo Zalayeta i cili mposhti portierin brazilian të Interit, Julio Cesar duke kaluar të pranishmit në delir në minutën e 73.

[Damian1]

Ryan Giggs fiton çmimin si futbollisti i Vitit nga PFA

Mesfushori veteran i kampionëve të botës, Europës dhe Anglisë është vlerësuar nga kolegët e tij në fushën e lojës, si më i miri për 2008

Veterani i Manchester United, Ryan Giggs, është nderuar me çmimin Lojtari i Vitit për sezonin 2008/2009 nga Asociacioni i Futbollistëve Profesional “PFA”.

Futbollisti 35-vjeçar ishte favorit sentimental për çmimin dhe pavarësisht se ishte fillestar në vetëm 12 ndeshje këtë sezon dhe 34 paraqitje gjithsej, u emërua lojtari më i mirë në vend duke mposhtur kapitenin e Liverpoolit, Steven Gerrard.

Ky ishte shpërblimi më i madh individual në karrierën 18-vjeçare të Giggs, pasi shumë më herët në karrierë kishte fituar dy herë çmimin Lojtari i Ri i Vitit.

[Damian1]

Xavi thumbon Chelsea në prag Champions: Nuk luan bukur

Futbollisti më i mirë i Euro 2008, Xavi Hernandez ka sulmuar kundërshtarët e Champions League, Chelsea në prag të sfidës mes tyre

Mesfushori i Barcelonës, spanjolli Xavi Hernandez, thotë se rivali i Ligës së Kampionëve, Chelsea, është një ekip fizik dhe që luan ashpër por nuk ka bukuri në lojë.

“Ata luajnë një ndeshje shumë efektive, por mbase mund të dalloni se nuk është loja më e bukur për t’u parë. E dimë se çfarë është në gjendje të bëjë Chelsea. Ata luajnë një futboll fizik dhe të ashpër, ndërsa ne dëshirojnë të luajmë ca më bukur”, ka thënë Xavi.

“Nëse ne luajmë në mënyrën tonë dhe me ritmin tonë, e dimë se do të jemi shumë të vështirë për t’u mposhtur. Nuk është në stilin tonë të ndryshojmë lojën për shkak të disa ekipeve që luajnë futboll të ashpër”, ka shtuar spanjolli.

[Damian1]

Fitore e vlefshme e Marseille në luftën për titullin

Olimpiku i Marsejit pas fitores të dielën mbrëma si mysafir i Lilit (2:1) në kuadër të xhiros së 33-të të kampionatit francez - “Ligue 1, ka bërë një hap të madh drejt titullit të kampionit

Skuadra e Lorik Canës, i cili nuk luajti për shkak të suspendimit, pesë javë para përfundimit të kampionatit ka pesë pikë më shumë se Bordo (një takim më pak të zhvilluar) dhe gjashtë se Lioni në vendin e tretë.

Vendësit në fillim të pjesës së dytë kaluan të parët në epërsi me anë të Hazardit (49'), mirëpo brenda tre minutave lideri përmbysi epërsinë e nikoqirit me anë të Sherjus (54') dhe Niangut (57').

Ligue 1 – java e 33-të

Okser – Kaen 2:1

(Jelen 86,88 - Proment 62)

Nansi – Nant 2:0

(Feret 56, Andre Luiz 67-pen.)

Sosho – Valencien 1:1

(Sverkos 90+3-pen. - Bangoura 62)

Le Avër – Grenobël 0:1

(Boya 41)

Le Man – Monako 0:1

(Park Chu-young 87)

Nica - Sent-Etieni 3:1

(Saada 23, Tavlaridis 44-ag, Mouloungui 73 - Ilan 90+4-pen.)

Tuluz - Lorient 1:1

(Cetto 89 / Ayew 85)

Të premten Lioni - PSZH 0:0

Renditja: Marseji 67, Bordo (një ndeshje më pak) Lioni 61, PSZH 60, Tuluzi 57, Lili 56, Reni (një ndeshje më pak) 51, Nica 47, Monako dhe Okseri nga 43, Grenobli 41, Lorienti dhe Nansi nga 39, Le Mani 38, Valencieni 37, Sosho dhe Nant nga 33, Sent-Etieni 32, Kaeni 31 dhe Le Avri 21 pikë.

[Damian1]

Bayern Munchen shkarkon trajnerin Jürgen Klinsmann

Skuadra kampione e Bundesliga, nuk ka pritur as fundin e kampionatit për të larguar Jürgen Klinsmann pas rezultateve të dobëta

Bayern Munchen mbetet pa trajnerin Jürgen Klinsmann i cili është shkarkaur nga drejtuesit e kampiones së Bundesligës, për shkak të rezultateve të dobëta në kampionat dhe Champions league.

Skuadra bavareze ende nuk ka dalë në një komunikatë zyrtare në lidhje me çështjen por gazeta gjermane “Bild” ka qenë ajo që në numrin e sortëm ka dhënë verdiktin e klubit gjerman.

Në bazë të vendimit për shkarkimin e Jürgen Klinsmann, eliminimi nga kupa e Gjermanisë, Champions League dhe forma e dobët në kampionat ku Bayern Munchen ndodhet pas kryesuesve.

“Bild” ka dhënë ndërkohë edhe emrin që do drejtojë Bayern deri në fund të kampionatit. Ai është Jupp Heynckess ndërsa Roberto Mancini po studiohet për trajner afatgjatë.

[Damian1]

Adebayor lavdëron Milan: Është sikur të më kërkonte Beyonce

Futbollisti togolez, Adebayor ka sponsorizuar në mënyrë direkte kalimin tek Milani në Qershor. ”Është sikur të më kërkonte Beyonce”

Sulmuesi i Arsenalit, Emmanuel Adebayor, thotë se interesimi i Milanit për shërbimet e tij gjatë verës së kaluar, ishte sikur dikush t’i thotë se këngëtarja Beyonce interesohet për të. Një kompliment direkt ndaj skuadrës kuqezi e cila mund të investojë 35 milionë Euro tek sulmuesi togolez.

“Jam me fat që luaj në këtë klub dhe të jem i sinqertë ndjehem mirë që Milani, një prej klubeve më të mira në Evropë, u interesua për shërbimet e mia. Për mua ajo ishte diçka e veçantë. Ishte sikur një djaloshi t’i thoni se Beyonce ju dëshiron”, thotë Adebayor.

“Ata më thanë se Milani më kërkon. Isha shumë i lumtur me këtë, por gjëja më e rëndësishme është të luaj për Arsenalin. Jam i lumtur këtu, andaj nuk kam nevojë të ndërroj ambient”, ka shtuar sulmuesi i Arsenalit.

[Damian1]

Sot Barcelona-Chelsea, mungojnë Deco, Cole, Carvalho

Blutë do të luajnë në Spanjë në mungesë të qendërmbrojtësit Ricardo Carvalho dhe ish-mesfushorit të Barcelonës, Deco

Sot në Camp Nou zhvillohet takimi i parë gjysmëfinal i Ligës së Kampionëve ndërmjet Barcelonës dhe Chelsea, ndërsa për shkak të lëndimeve, skuadra nga Liga Premier nuk do të mund të llogarisë në shërbimet e Carvalhos dhe Decos, ndërsa mungesave iu shtohet edhe i pezulluari Ashley Cole.

Skuadra e plotë e Chelsea e cila do të jetë e gatshme në Barcelonë: Cech, Hilario, Belletti, Alex, Ivanovic, Bosingwa, Mancienne, Terry, Lampard, Ballack, Obi, Kalou, Essien, Malouda, Di Santo, Anelka, Stoch, Drogba.

[Damian1]

Toure: Arsenali nuk ka frikë nga askush...

Mbrojtësi i Arsenalit, Kolo Toure, thotë se klubi nuk duhet t’ia ketë frikën askujt, e as kundërshtarit të radhës në Ligën e kampionëve, Manchester United.

Forma e topçinjve në pjesën e dytë të sezonit ka qenë e shkëlqyeshme dhe iu ka dhënë atyre vetëbesim për dy ndeshjet gjysmëfinale përballë Manchesterit.

“Për mua, unë nuk kam frikë nga asnjë ekip. E di se çfarë duhet të bëj kur luaj. Ka më shumë presion në United pasi ai është ekipi që duhet të mposhtet”, ka thënë Toure.

“United është ekipi që fitoi sezonin e kaluar, por ne do të japim më të mirën që mundemi nga vetja, do të luajmë të lirë dhe do ta pasojmë topin. E dimë se kur luajmë kundër tyre, ata gjenden në vështirësi”, ka shtuar mbrojtësi nga Bregu i Fildishtë.

[Damian1]

Pique: Drogba është një sulmues kompletuar...

Mbrojtësi i Barcelonës, Gerard Pique, e vlerëson sulmuesin e Chelseat, Didier Drogban si një sulmues te kompletuar, para përballjes mes dy ekipeve në kuadër të gjysmëfinales së Ligës së Kampionëve.

“Ai është sulmuesi më i vështirë që kemi përballë. Ai është një atlet, i cili është po ashtu inteligjent kur ka topin nën kontroll”, thotë Pique për “El Mundo”.

“Ai është një prej sulmuesve më të kompletuar në botë. Ai është i fuqishëm, i mirë në ajër, i shpejtë dhe shumë i mirë në goditje”, ka shtuar mbrojtësi i Barcelonës.