Mbyllur-Lajme dhe Diskutime per Sportin! Futboll.:.Motosport .:.etj

[Damian1]

Manchester United në finalen e Champions, 1-3 ndaj Arsenal

Gjysmëfinalja e dytë mes Arsenalit dhe Manchester United u mbyll 1-3 për kampionët në fuqi që sigurojnë finalen e Champions që do luhet në Romë. Finalisti tjetër del nga Chelsea-Barcelona

Një avantazh i dyfishtë në pjesën e parë ndaj Arsenalit dhe një ndeshje e fituar 1-3 në tempullin e “Gunners”, projekton Manchester United drejt finales së dytë radhazi në Champions League.

“Red Devils” shënuan tre gola ndaj londinezëve duke pësuar një, në stadiumin “Emirates” në gjysmëfinalen e kthimit në një ndeshje spektakolare.

Në fillim ishte mesfushori koreano-jugor Ji Sung Park që shënoi në portën e spanjollit Almunia me pak faj të mbrojtësit të ri londinez, Gibbs që në minutën e tetë.

Më pas erdhi një perlë e Cristiano Ronaldos me një goditje dënimi e cila meritoi duartrokitjet e të gjithë të pranishmëve në “Emirates” ndërsa policia evakuonte një zonë të tifozëve për arsye sigurie.

Më pas një asist i sulmuesit Rooney finalizohet në rrjetë nga Cristiano Ronaldo për shifrat 0-3 ndërsa Arsenali dështonte në çdo përpjekje në zonën e Van Der Saar. Por Arsenal ngushtoi diferencën me një penallti të holandezit Robin Van Persie ndërsa Fletcher la fushën me të kuqe, i ndëshkuar nga arbitri italian Rosetti për faull në zonë.

Por ndeshja kishte marrë tjetër rrjedhë dhe kështu Manchester United siguron finalen e 27 Majit në Romë pasi “Red Devils” fituan edhe ndeshjen e parë 1-0. Tashmë kampionët në fuqi do të shohin nëse do të luajnë si vjet ndaj Chelsea, apo do kenë përballë Barcelonën.

[Damian1]

Gullit: Drogba lojtari kyç kundër Barcelonës...

Legjenda holandeze, Ruud Gullit, beson se sulmuesi i Chelseat, Didier Drogba, është arma më e fortë e Bluve në përballjen e të mërkurës mbrëma kundër Barcelonës.

“Ajo që duhet të jetë kryesore në lojën e Chelseat është që topi t’i pasohet sa më shpejt Drogbës. Topi i parë duhet t’i dorëzohet Drogbës, ndërsa Lampard duhet të jetë afër për ta pranuar topin e dytë, si edhe futbollistët anësorë si opsion”.

“Këtu është fuqia më e madhe e Chesleat. Ata duhet të shkaktojnë presion ndaj mbrojtjes së Barcës, sidomos për faktin se mungon Marquez dhe Puyol”.

“Derisa Barca di të luajë vetëm në një mënyrë, Chelsea ka planin A dhe B. Në ndeshjen e parë Chelsea dëshmoi se është skuadër e mençur”.

“Mendoj se Chelsea do të paraqitet me të njëjtën mënyrë të lojës, si në ndeshjen e parë. Ndërsa është shumë me rëndësi që të eliminohen Xavi dhe Iniesta, sepse ata do t’i bëjnë pasimet kryesore drejt sulmuesve”, ka përmbyllur analizën e tij Gullit.

[Damian1]

Chelsea, trajneri Hiddink: Na vodhën kundër Barcelonës

Trajneri Hiddink mbështet reagimin e lojtarëve të tij pasi sipas holandezit, Chelsea duhej të ishte kualifikuar me meritë në finale

Trajneri i Chelsea, Guus Hiddink, ka mbështetur reagimin e lojtarëve të tij për, sipas tyre, padrejtësinë që iu bë Bluve në ndeshjen kthyese të gjysmëfinales së Ligës së Kampionëve kundër Barcelonës.

“Jam shumë i zhgënjyer”, tha trajneri Guus Hiddink për rrjetin britanik “Sky Sports”, pasi kishte kaluar një kohë me lojtarët e tij në fund të ndeshjes dramatike në “Stamford Bridge”.

“Duke shikuar reagimin e lojtarëve nuk do të them se çfarë ndjej, por kjo është një padrejtësi”, ka vazhduar Hiddink, i cili ka përmendur rastet e prekjes së topit me dorë brenda gjashtëmbëdhjetëmetërshit nga lojtarët e Barcelonës dhe tërheqjen e Florent Maloudas dhe Didier Drogbas, të cilat sipas tij është dashur të jenë penallti.

[Damian1]

De Rossi mund të largohet nga Roma...

Roma ka pasur një sezon zhgënjyes duke mos arritur të kualifikohet në Ligën e Kampionëve për sezonin e ardhshëm, dhe kjo do të thotë që skuadra do të detyrohet t’i shesë disa lojtarë të rëndësishëm.

Njoftohet se Interi ka përgatitur një ofertë prej 40 milionë eurosh për ta joshur mesfushorin Daniele De Rossi drejt Giuseppe Meazzas.

“Skuadra është në një situatë shumë të vështirë. Unë pres dy ose tre largime të lojtarëve të rëndësishëm”.

“Pa dyshim që Mexes do të largohet, ndërsa lojtari tjetër mund të jetë Perrotta. Ndërsa nëse paraqitet ndonjë ofertë e madhe, atëherë mendoj se edhe De Rossi do të shitet”, ka thënë agjenti italian Vincenzo Morabito për “24oredisport”.

[Damian1]

Steven Gerrard: Liverpooli do ta fitojë Premier League

Kapiteni i Liverpool ka thënë se beson më shumë se kurrë se mund të fitojnë kampionatin anglez pavarësisht diferencës me United

Simboli i Të Kuqve, Steven Gerrard, është i bindur se Liverpooli mund ta fitojë titullin e Ligës Premier këtë sezon, përkundër se Manchester United gjendet tre pikë përpara, ka një ndeshje më pak të zhvilluar, ndërsa për Redsat në lojë janë edhe nëntë pikë (tri ndeshje).

“Sinqerisht besoj se kjo skuadër do ta fitojë Ligën Premier. Besoj se do ta kap me duart e mia trofeun”. “Jemi shumë afër për t’ia arritur qëllimit këtë sezon, ndërsa nëse nuk jemi të suksesshëm sivjet dhe United shpallet kampion, atëherë mendoj se do të kalojnë, tre, katër ose pesë vjet, derisa të na jepet mundësia e radhës”.

“Krejt çka dua në jetë është ta fitoj titullin me Liverpoolin”, është cituar kapiteni Steven Gerrard nga gazeta e njohur “The Daily Mail”.

[Damian1]

Armiku publik i Chelsea, Bosingwa: Ovrebo, ishte i blerë

Mbrojtësi portugez Jose Bosingwa ka thënë se arbitri ndaj Barcelonës ishte i blerë dhe tashmë nuk duhet të gjykojë më

Chelsea në protestë pas ndeshjes dhe një ditë pas saj. Të gjithë anëtarët e skuadrës londineze e kanë quajtur skandaloz gjykimin e arbitrit norvegjez Ovrebo dhe kanë kërkuar ndëshkimin e tij maksimal.

Jose Bosingwa ka lëshuar madje një sulm personal ndaj gjyqtarit Tom Henning Ovrebo, duke e cilësuar arbitrin si nëj hajdur dhe të blerë. Blutë nuk do të mund të marrin hak ndaj Manchester Uniteed në finale pasi në ndeshjen e parë barazuan 0-0.

“Ky arbitër ishte i blerë. Nuk e di nëse ishte arbitër apo hajdut” tha Bosingwa pas ndeshjes. Edhe Didier Drogba nuk mundi të kontrollojë emocionet duke sulmuar arbitrin i cili mbeti disa momente në fushë duke mos hyrë në dhomat e zhveshjes.

[Damian1]

Një blitz i Juventus zyrtarizon blerjen e brazilianit Diego

Braziliani Diego ka ndërruar skuadër ende pa nisur mirë merkatoja duke lënë Werder Bremen për Juventus, për shifrën e 25 milionë Euro

Ishte shënjestra e shumë klubeve europiane por në fund ka vendosur të vazhdojë karrierën në Serie A.

Braziliani i talentuar Diego ka vendosur që të luajë me Juventusin duke filluar nga sezoni i ardhshëm ndërsa marrëveshja është bërë zyrtare.

Ka qenë një blitz i drejtorit sportive Secco si dhe administratorit të Juventus, Blanc të cilët kanë bindur skuadrën gjermane nga Bremen, për të lënë të lirë xhevahirin e tyre.

Ndërkohë për vetë futbollistin brazilian është gati kontrata 3.5 milionë Euro në sezon për 5 vitet e ardhshme me Juventusin. Mbeten me “gisht në gojë” Real Madrid, dhe Bayern Munchen.

[Damian1]

Messi magjepset nga Londra: Mund të kaloj në Premiership

Talenti argjentinas pas ndeshjes ndaj Chelsea ka shprehur admirim për mënyrën si përjetohet futbolli në Angli

Argjentinasi Lionel Messi ka shprehur admirimin e tij për futbollin anglez duke pohuar se një ditë do të dëshironte të luante në Premier League, mirëpo aktualisht nuk mendon për braktisjen e Barcelonës, pasi që po kalon shumë mirë te skuadra kataluanse.

“Futbolli në Angli është shumë i bukur, sikurse në Spanjë, por tani për tani ndjehem shumë i sistemuar dhe ndjehem shumë i vlefshëm te Barcelona” tha Lionel Messi.

“E di se Premiershipi është një ligë e madhe, por Barcelona është pjesë shumë e rëndësishme e jetës sime dhe nuk mendoj për asnjë skuadër tjetër. Ndoshta me kalimin e kohës do të ndodhë diçka, kurrë s’i dihet”, ka thënë argjentinasi Messi.

[Damian1]

Guardiola: Arbitri? Mund ta kuptoj zhgënjimin e Chelsea

Trajneri i Barcelonës, Josep Guardiola ka pranuar se për shkak të gjyqtarit, Chelsea mbetet jashtë finales së Champions League

Trajneri i Barcelonës, Pepe Guardiola, është përgjigjur në mënyrë diplomatike për ndarjen e drejtësisë në ndeshjen e kthimit gjysmëfinale të Ligës së Kampionëve ndaj Çelzit në "Stamford Bridge". "Mund ta kuptoj kampin e Çelsit që janë të zhgënjyer me ndarjen e drejtësisë nga gjyqtari norvegjez”.

“Nuk i kam parë ato penallti, për të cilat skuadra londineze thotë se kanë ekzistuar. Megjithatë “e la të hapur mundësinë se ato vërtet kanë ekzistuar", ka thënë Guardiola. Më pas trajneri i ri spanjoll ka folur për skuadrën e tij. "Kemi merituar të jemi në finale. U përpoqëm të luajmë lojën tonë, të kemi sa më shumë topin në zotërim dhe të krijojmë raste”.

“U angazhuam për fitore, edhe pse nuk kishim shumë raste shënimi. Megjithatë, që të jem i sinqertë kam pritur një presion shumë më të madh nga Çelsi. Mos harroni se 25 minuta kemi luajtur me një futbollist më pak, kurse Çelsi në atë periudhë loje u tërhoq në mbrojtje”.

“E kishim shumë të vështirë të luanim edhe 11 me 11, e lëre më me një futbollist më pak. Por, për këtë arsye jemi edhe më të lumtur që arritëm të shënojmë me një futbollist më pak në fushë", ka përfunduar Guardiola.

[Damian1]

Ballack: Luajtëm kundër më të mirit dhe merituam finalen

Mesfushori gjerman Michael Ballack mendon se Chelsea meritoi të kualifikohet në finalen e Ligës së Kampionëve dhe se ndjen të njëjtën dhimbje si në finalen e vitit të kaluar në Moskë.

Chelsea përjetoi një tronditje tjetër në Ligën e Kampionëve, kur në minutat shtesë të ndeshjes gjysmëfinale ndaj Barcelonës, pësoi një gol nga Iniesta, duke humbur kështu shansin për të udhëtuar në finalen e Romës.

“Treguam karakter të shkëlqyeshëm. Luajtëm kundër një top-ekipi në Evropë, ndoshta edhe ekipin më të fuqishëm për momentin dhe merituam të shkojmë më tej”, ka thënë Ballack.

“Sezonin e kaluar kishim vërtet një zhgënjim të madh, kur vetëm një penalti na ndau nga fitimi i trofeut. Mbrëmë pësuam gol në minutën e 93-të dhe ishte e pabesueshme. Fati nuk është në anën tonë. Vitin e kaluar kishim një dhimbje, dhe këtë vit është sërish e njëjta”.

“Kupa FA është rasti i fundit për të fituar trofe këtë vit dhe do të përpiqemi ta bëjmë këtë. Kemi punuar shumë, si edhe për këtë ndeshje, dhe duam ta fitojmë kupën”, ka përfunduar mesfushori gjerman.